Ծրագրի նկարագրություն

«Երևան քաղաքի ջրային էկոհամակարգերի պահպանում և բարելավում» ծրագրի նպատակն է համալիր միջոցառումների միջոցով ապահովել Երևան քաղաքի ջրային էկոհամակարգերի կայունությունը  և կենսաբազմազանությունը:

Ծրագիրը միտված է Հրազդան գետի, Երևան քաղաքում դրա խոշոր վտակների և Երևանյան լճի ջրերը մաքրելուն՝ կենցաղային աղբից և կոյուղաջրերից: Այդ նպատակով Երևանյան լճից հանվել է շուրջ 10,000 խ.մ․ աղբ, Հրազդան գետից 2023-2024թթ. ընթացքում՝ շուրջ 18,000 խ.մ աղբ: Հրազդան գետի վրա տեղադրվել է աղբաորսիչ հարմարանք, ներկայումս տեղադրվում են ևս երկուսը:  Գետառ գետի վրա, նախքան Հրազդան գետ թափվելը, կեղտաջրերի մաքրման կայանի կառուցումը ավարտական փուլում է: Բանակցություններ են վարվում Հրազդան և Գետառ գետերի հարևանությամբ առկա տնտեսվարողների հետ՝ կեղտաջրերի մաքրման լոկալ կայանների տեղադրման համար։

Իրականացվում են Հրազդանի կիրճում առկա հողօգտագործման իրավունքների, ինչպես նաև կենսաբազմազանության գույքագրման և քարտեզագրման համալիր աշխատանքներ, որի արդյունքում կներկայացվեն համապատասխան հիմնավորումները՝ ՀՀ կառավարության կողմից Հրազդանի կիրճին բնության հատուկ պահպանվող տարածքի (ԲՀՊՏ) կարգավիճակ տրամադրելու համար: Դա նախադրյալներ կստեղծի Հրազդանի կիրճի էկոհամակարգերի առավել արդյունավետ պահպանություն իրականացնելու համար։

Ծրագրի արդյունքում ստեղծվելու է Հրազդանի կիրճ բնության հատուկ պահպանվող տարածքը, որը նոր հիմքերի վրա է դնելու տարածքի էկոհամակարգերի պահպանությունը; Արդյունքում բարելավվելու են Հրազդան և Գետառ գետերի, Երևանյան լճի ջրի որակական բնութագրիչները, վերականգնվելու են Հրազդանի կիրճի անտառային էկոհամակարգերը, ուժեղացվելու է կիճի կենսաբազմազանության պահպանությունը, դադարելու են տարածքի հողերի օտարումները և կառուցապատումները, որոնք բացասական ազդեցություն են ունենում Հրազդանի կիրճի էկոհամակարգերի տարբեր բաղադրիչների վրա։