«Սեւանա լճի ավազանի հողածածկույթի եւ մարդածին ճնշումների քարտեզագրում» խորագրով աշխատարան
06.09.2022
Սույն թվականի սեպտեմբերի 6-ին Գեղարքունիքի մարզպետարանում կայացավ «Սևանա լճի ավազանի հողածածկույթի և մարդածին ճնշման քարտեզագրում» խորագրով աշխատաժողովը, որը կազմակերպվել էր «Կանայք կլիմայում և էներգետիկայում» ՀԿ-ի կողմից՝ Եվրոպական միության և Գերմանիայի կառավարության կողմից ֆինանսավորվող «Սևանա լճի շրջակա միջավայրի պահպանություն» (EU4Sevan) ծրագրի ներքո: Աշխատաժողովին մասնակցեցին ներկայացուցիչներ Գեղարքունիքի մարզպետարանից, Գավառ խոշորացված համայնքի 15 բնակավայրերից, ինչպես նաև քաղհասարակության ներկայացուցիչներ, ովքեր իրենց ներդրումն ունեցան ավարտական արդյունքի ամբողջացման աշխատանքում:
Աշխատաժողովի ընթացքում ներկայացվեց «Կանայք կլիմայում և էներգետիկայում» ՀԿ-ի հետազոտական թիմի կողմից պատրաստված արբանյակային տվյալների և դաշտային հետազոտությունների հիման վրա մշակված հողածածկույթի և թեժ կետերի քարտեզները: Աշխատաժողովից հետո մասնակցային մեթոդով անցկացվեց գործնական աշխատանք, որի ժամանակ Գավառ համայնքի ներկայացուցիչները ՀԿ-ի և ծրագրի թիմի հետ համատեղ վերանայեցին քարտեզագրական նյութերը, բացահայտեցին խնդիրները և ներկայացրեցին առաջարկներ։ Մշակված քարտեզները և աղյուսակները էլ․ փոստով կուղարկվեն բնակավայրերի ներկայացուցիչներին՝ վերջնական լրացումներ կատարելու համար։